Tre ditë më parë një shumë rekord prej 522 mijë eurosh u gjet e fshehur në tavanin e një autobusi që vinte nga Padova për në Shqipëri, duke çuar pas hekurave shoferin (njëherësh pronarin) e mjetit Elidin Çela dhe dy ndihmësit e tij.
Fillimisht Çela hezitoi të fliste për hetuesit, duke kërkuar vetëm një avokat për ta përfaqësuar, por pas marrjes në pyetje për herë të dytë ka rrëfyer se paratë ishin kursime të familjes. Ai gjithashtu ka sqaruar se kemi të bëjmë me të ardhura të krijuara nga biznesi, duke u treguar i gatshëm që të vërë në dispozicion edhe faturat.
“Mallrat janë të emigrantëve që jetojnë në Itali, i deklarova në doganën e Barit. Kemi biznes, paratë janë kursime të familjes, do investoja në toka me qira dhe bujqësi. Askush nuk e dinte për paratë në autobus, kisha frikën e ndonjë grabitjeje”, mësohet të ketë deklaruar ai.
Ndërkohë, sa i përket ndihmësve Dritan Kamberi dhe Anold Cankja, 32-vjeçari sqaron se janë shoferë dhe ka pak kohë që i ka punësuar në firmën e tij e cila është e licensuar për transport ndërkombëtar udhëtaresh në linjën Padova-Lushnjë.
Subjekti është “Celagron Buon Aventura” dhe administrohet nga Çela.
Të pyetur në lidhje me këto fakte Dritan Kamberi dhe Anold Cankja ndër të tjera kanë deklaruar se nuk kanë pasur dijeni për shumën e parave të fshehura në autobus.
Ata gjithashtu kanë deklaruar se këtë autobus pasi kanë mbërritur në Itali e kanë parkuar tek ambientet e shtetasit Elidon Çela për rreth 3 ditë dhe e kanë marrë vetëm në udhëtim si në vajtje ashtu dhe në kthim.
Sipas tyre janë të punësuar tek subjekti i shtetasit Elidon Çela, por kanë qenë si shoferë vetëm për këtë udhëtim. Ndërkohë, Prokurori e Durrësit kërkon vendosjen e masës së sigurisë “detyrim paraqitje” për dy ndihmësit.
