Një 35-vjeçare rumune është gjetur e vrarë në shtëpinë e saj në Bolzano të Italisë. Trupi i saj i pajetë u gjet pasditen e së dielës nga policia në banesën në Viale Trieste, ndërsa në kërkim për ngjarjen është shpallur bashkëshorti i saj shqiptar.
Sipas mediave italiane Avni Mecje dyshohet se i ka marrë jetën Alexandra Elena Mocanu, e cila së fundmi jetonte në kryeqytetin e Tirolit Jugor ku punonte si banakiere.
Trupi i gruas u gjet i mbështjellë me një batanije në apartamentin, në pallatin që ndodhet në afërsi të pishinës publike “Lido”, një zonë rezidenciale, midis lumenjve Isarco dhe Talvera.
Ndërkohë, alarmi se Mecje mund të ketë kryer vrasjen erdhi pas një denoncimi nga të afërmit e tij, me të cilët kishte komunikuar në telefon duke i njoftuar se duhej të arratisej sepse ishte në kërkim.
Ai është larguar nga Bolzano me makinën dhe telefonin e gruas së tij dhe dyshohet se mund të jetë kthyer në Shqipëri.
