Drejtori i Përgjithshëm i Policisë së Shtetit, Muhamet Rrumbullaku ka deklaruar se punonjësit e policisë së patrullës që bënë ndalimin e Laer Kurtit, janë të pezulluar nga detyra deri në përfundim të hetimeve.
Në një prononcim në ‘Çim Peka LIVE’, Rrumbullaku nuk preferoi të bëjë komente dhe të japë informacione të tjera në lidhje me ngjarjen, duke u shprehur se policia duke qenë palë e kësaj ngjarje, nuk mund të japë asnjë deklaratë.
“Policia duke qenë palë, në lidhje me problemin, nuk ka dhënë asnjë lloj deklarate. Përgjigjia ime është e thjeshtë dhe e qartë. Është një rast fatkeq. Nuk kemi një polici të inkriminuar. Nëse bëhet fjalë për rastin, do të ketë një ekspertizë mjekoligjore. Unë jam drejtor i përgjithshëm dhe nuk mund të jem pjesë e hetimit. Po janë të pezulluar punonjësit e policisë’, tha kreu i Policisë së Shtetit, Muhamet Rrumbullaku.
Laer Kurti humbi jetën pas shoqërimit nga policia mbërmjen e djeshme në Tiranë.
Përmes një reagimi, Agjencia e Mbikëqyrjes Policore ngriti dyshime se i riu i shoqëruar nga policia humbi jetën pasi gëlltiti një qese me drogë. “Nga autopsia e kryer në Institutin e Mjekësisë Ligjore, rezultoi se në stomakun e viktimës është gjetur një qese plastike e çarë me ngjyrë të bardhë me përmasa 5×5 cm, e dyshuar si ambalazh i lëndës narkotike, e cila i është nënshtruar ekzaminimit në Institutin e Policisë Shkencore”, njoftoi AMP.
Por, janë ngritur dyshime mbi vërtetësinë e këtij versioni. Opozita ka akuzuar uniformat blu për dhunë ndaj të riut dhe papërgjegjshmëri në mënyrën si kanë trajtuar rastin. Të njëjtat dyshime ngriti dhe i ati i viktimës.
