Në pikat kufitare në vend janë raportuar probleme me sistemin TIMS, që përdoret nga policia për të regjistruar hyrje-daljet për në territor.
Në Portin e Durrësit raportohet se me dhjetëra qytetarë, mes tyre të moshuar dhe fëmijë të cilët ishin në pritje për t’u nisur drejt Italisë janë njoftuar për rënien e sistemit TIMS dhe puna e punonjëse të pikës kufitare do të vijojë me regjistra.
Shumica prej pasagjerëve janë nxjerrë jashtë traut të portit, ndërsa nisja e trageteve pritet të vonojë.
Probleme raportohen edhe në Pikën Kufitare të Kakavijës. Aty, sistemi TIMS nuk funksionon prej orës 21:50. Edhe në këtë pikë kufitare po punohet me regjistra me dorë.
E njëjta situatë edhe në Kapshticë, Qafë-Thanë e Tushemisht.
Nuk dihet nëse problemet me sistemin lidhet me ndonjë sulm të ri kibernetik. Disa javë më parë, sistemi TIMS pati probleme në pikat kufitare për shkak të një sulmi kibernetik që sipas autoriteteve u krye me mbështetje të Tehranit zyrtar.
Deri më tani, nuk ka ende një konfirmim zyrtar nëse kemi të bëjmë me të njëjtin skenar, apo ndonjë problem tjetër me sistemin.
