Ishulli grek i Kretës është goditur ditën e djeshme nga një stuhi e pazakontë me reshje të dendura shiu dhe erë të fortë, e cila ka shkaktuar dëme të mëdha në qytetet e Heraklionit dhe Lasithi, ndërsa i mori jetën edhe 50-vjeçarit Konstantinos Vergakis në zonën e Agia Pelagia.
Pamjet që vijnë nga ishulli helen i përngjajnë apokalipsit, pasi rrugët janë kthyer në “lumenj”, ndërsa prona dhe dyqane janë shkatërruar në pedonalet kryesore të qyteteve.
https://youtu.be/vEWB3iQ382w
Sa i përket vdekjes së fotografit 50-vjeçar ajo ishte tragjike, pasi ai u gjet i pajetë në makinën e tij që u bllokua në kanalin që u krijua pas përmbytjes, ndërsa një grua e cila kishte shkuar në punë me të dhe ishte pasagjere në mjet rezulton ende e zhdukur.
https://youtu.be/KmluwBlOyLE
Për gjetjen e saj janë angazhuar edhe polumbarët, ndërsa operacioni është shtrirë edhe në det.
Ekipet e shpëtimit po kërkojnë gjithashtu persona të bllokuar brenda makinave që i ka rrëmbyer rrjedhja e ujit.
Qindra telefonata janë marrë nga zjarrfikësit që nga mëngjesi i djeshëm kur filluan reshjet e shiut për të ndërhyrë në situata të rënda.
Guvernatori rajonal i Kretës, Stavros Arnautakis , i cili ishte në vendngjarje që në momentin e parë ka komentuar imazhet e shkatërrimit biblik.
“Brenda 45 minutash kanë rënë 70 milimetra shi, dukuri të cilat ndodhin më rrallë se njëherë në 100 vite. Pra, çfarëdo studimi të kishte, asgjë nuk mund të parashikohej”, tha ai.
https://youtu.be/49sPKa8kl5c
Të dhënat e para agregate tregojnë se sasia e shiut që ka rënë ka qenë e papritur. Kjo është 1/3 e shiut që bie në total çdo vit në Kretë dhe ka rënë brenda pak orësh, ndërsa bashki si Heraklioni dhe Sitia janë në gatishmëri të lartë.
Ndërkohë, dy gra u shpëtuan fatmirësisht gjallë nga emergjencat civile në Lygaria, ndërsa 30 persona u dërguan në një vend të sigurt në zonat e Heraklion dhe Lasithit, mes të cilëve 9 nga zona arkeologjike e Sitisë, ku përfshiheshin edhe 2 fëmijë.
