Policia e Lezhës jep detaje për ngjarjen e ndodhur në orët e para të mëngjesit të sotëm, ku në portën e banesës së një efektivi të policisë rrugore u vendos tritol.
Sipas policisë, në fshatin Manati, në portën e oborrit të banesës së shtetasit Zef Kola, rreth 50 m nga godina e banesës, në anë të rrugës kryesore Manati-Lezhë, është vendosur një sasi e dyshuar lëndë plasëse e cila ka shpërthyer duke dëmtuar një seksion të portës.
Në vendngjarje po mbërrijnë specialistë të Njësisë Antieksploziv, për të kryer veprimet përkatëse për përcaktimin e llojit dhe sasisë së lëndës plasëse. Edhe vetë polici është pyetur nga kolegët në lidhje me ngjarjen, për të parë nëse sulmi ka lidhje me detyrën apo bëhet fjalë për ndonjë konflikt tjetër të tij.
Grupi hetimor në vendin e ngjarjes, vazhdon veprimet hetimore për zbardhjen e plotë të kësaj ngjarje.
