Një i ri shqiptar ka shkaktuar panik në radhët e pasagjerëve në Aeroportin e Zyrihut në Zvicër.
Kjo pasi, 27-vjeçari shqiptar ka hyrë pa autorizim në ambientet e aeroportit duke ecur në mes të pistës në këmbë.
Mediat vendase bëjnë me dije se shqiptari hyri në pistë rreth orës 22:00, ndërsa më pas vodhi një makinë me të cilën iu drejtua pistës 28 për të shkuar në zonën E të aeroportit.
Kjo është zona nga ku kryesisht nisen fluturimet për distanca të gjata në aeroportin e Zyrihut dhe synimi i 27-vjeçarit ishte që të hipte në një avion për në Johannesburg, të Afrikës së Jugut.
Ai mbante veshur një jelek fluoreshent që kishte gjetur aty pranë, por ekuipazhi ia mohoi hyrjen duke e larguar.
Por historia nuk u mbyll me kaq, pasi shqiptari u gjet nga një punonjës i aeroportit në kabinën e një tjetër aeroplani, që ishte nisur për në São Paulo të Brazilit.
Aty autoritetet ndërhynë duke e arrestuar 27-vjeçarin. Pas shoqërimit të tij, një mjek e ka ekzaminuar shqiptarin “dukshëm të çorientuar”, raporton media “K-Tipp”.
Ndërkaq, një zëdhënëse e aeroportit tha se “hetimet për këtë incident ende nuk kanë përfunduar plotësisht”.
