Shqiptarët janë populli më i “padëshiruar” nga Bashkimi Europian, kjo në raport me numrin e lartë të atyre që përpiqen të emigrojnë në shtetet e “Bllokut”. Të dhënat nga Organizata Europiane e Ruajtjes së Kufijve, FRONTEX tregojnë se emigrantët nga Shqipëria kryesojnë listën e të kthyerve me forcë me mbi 5 mijë raste duke u ndjekur nga Tunizia, Gjeorgjia, Maroku e Turqia.
Gjithashtu, shqiptarët renditen të shtatët në botë për numrin më të lartë të emigrantëve që qëndrojnë në mënyrë të parregullt në një nga vendet e “unionit”.
Të dhënat e FRONTEX tregojnë se numri i emigrantëve të parregullt nga Shqipëria që kërkojnë një strehë në vendet e Bashkimit Europian ka ardhur duke u rritur, duke arritur në gati 26 mijë vitin e shkuar.
Në vitin 2021, Bashkimi Europian raportoi rreth 200 mijë kalime të paligjshme kufitare në shtetet anëtare. Kjo sipas Raportit të FRONTEX ishte më e larta e regjistruar që nga viti 2017.
/A2 News/
