Ndryshe nga çfarë paralajmëruan në përfundim të protestës së tyre të parë, Sindikata e Pedagogëve dhe përfaqësuesit e saj kanë afruar datën e tubimit të radhës, ku do t’i kërkojnë sërish qeverisë përmbushjen e kërkesave që lidhen me rritjen e pagave dhe financimin e kërkimit shkencor.
Protesta e radhës do të zhvillohet të premten e 14 tetorit, vetëm 3 ditë para fillimit të vitit të ri akademik, të cilin pedagogët paralajmërojnë se do ta bojkotojnë në rast se qeveria nuk ulet të negociojë kushtet që ata kanë vendosur.
Tubimi do të mbahet në sheshin para Universitetit të Arteve në Tiranë, ndërsa viti akademik 2022-2023 është zyrtarisht në rrezik, pasi pedagogët deklaruan sot se “deri tani është në fuqi që nuk do të hyjmë në auditore më 17 tetor”.
“Më datën 14 do të marrim një vendim. Mendjen e kemi tek studentët. Të kemi një arsim të lartë publik serioz. Nuk është një shifër e madhe është 15 mln euro. Deri tani data 17 qëndron pasi qeveria ka një javë kohë, ndaj është protesta e datës 14 që të nxjerrim një konkluzion. Në datën 14 kemi ftuar edhe studentët dhe anëtarët e senatit janë të mirëseardhur. Do të diskutojmë për hapat. Nuk ka pasur negociata, mendoj që gjatë kësaj jave t’i japim mundësinë qeverisë që të propozojë negociata”, tha kreu i sindikatës, Aleksandër Kovaçi.
Ndërkohë, Kovaçi bëri me dije se është ushtruar presion përkundrejt pedagogëve të ndryshëm nga Dekanë apo Rektorë për të mos marrë pjesë në tubimet e radhës.
“I bëjmë thirrje sistemit të drejtimit të universiteteve të kontribuojnë për realizmin e të drejtës së profesoratit për të protestuar. Në po mbledhim verifikime nëse një dekan apo rektor të ketë raste të tilla. Ka pasur në mënyrë indirekte me telefonata që të mos përfshihemi në protesta, por nuk besoj se do të ndikojnë në interes të tyre”, shtoi më tej Kovaçi.
Ndërkohë, pedagogët thonë se rritja e pagës me 7% që kryeministri iu ofroi në ditën kur ata dolën për të protestuar, është e papranueshme dhe nuk mjafton as për të tejkaluar normën e inflacionit.
“Sindikata është e vendosur të mbështesë kërkesat e drejtuara ndaj Kryeministrit dhe Ministrisë së Arsimit. Sindikata e quan të papranueshme rritjen e premtuar me 7% të rrogës nga Kryeministri, ndërkohë rritja 30% këtë vit është një hap drejt rregullimit ët gjendjes. Vendimi i sindikatës është i qartë, tarifat e studentëve duhet tu kthehen atyre pas. Ditën e premte në orën 14:00 protestojmë para universitetit të Arteve në Tiranë, ftojmë çdo koleg në universitete shqiptare”, deklaroi ai.
Pedagogu Lush Susaj në fjalën e tij pati një thirrje të drejtpërdrejte për studentët, duke ju kërkuar që të bashkohen me protestën dhe të marrin fatin e tyre në dorë.
“Përse të detyrojmë rininë të ikë. Po mbyllen degë jetike. Kush është ai që e çon fëmijën e tij për mësues kur i duhet të futen në portale e shumë e shumë procese të tjera. Punësohet një student që mbaron inxhinieri minierash dhe jo një student që mbaron master shkencor. Thirrje studenteve të reagojnë, thirrje pedagogëve të reagojnë për interesa të kombit dhe jo të interesave personale. Ne po i bëjmë thirrje shtetit me vënë në punë. Nuk duam të ndërrojmë kryeministra”, tha Susaj.
