Një nga vëllezërit Beqiraj, Indriti që u mor peng nga grupi i “Rrumit” të Shijakut vetëm pak ditë më parë në autostradën Tiranë-Durrës ka zbuluar detaje të reja për takimet që ka pasur me “killerin” Kevin Zeneli (alias Kevin Suçi).
Sipas Beqirajt, ata janë takuar pas masakrës së Don Boskos, ku Zeneli ngatërroi objektivin duke ekzekutuar të pafajshmin Erjon Çela dhe la të plagosur 4 qytetarë të tjerë që po konsumonin kafe në një lokal të lagjes.
Porosia e famëkeqit Kasandër Noga për krahun e tij të djathtë kishte qenë vrasja e armikut të tij Geron Hasanbelliu, por gabimisht u 35-vjeçari.
Në dëshminë e zbardhur nga emisioni “Uniko”, Beqiraj tregon se me Kevinin është takuar në “Urën e Dajlanit” në Durrës, pesë ditë pas atentatit të 1 janarit, pasi i kishte kërkuar një test Covid për të kaluar kufirin e për tu larguar drejt Kroacisë e më pas drejt Gjermanisë.
Beqiraj tregon gjithashtu se Kasandër Nogën ka takuar Zenelin diku në Europë pas masakrës së Don Boskos dhe i ka kërkuar llogari për gabimin, ndërsa e ka udhëzuar edhe që të eliminojë nipat e Hasanbelliut që qëndronin në zonën e Astirit.
DËSHMIA:
Më datë 4 janar, ka ndodhur një ngjarje në Don Bosko tek lokal Fokus, ku është qëlluar me armë dhe janë vrarë persona, kam parë në lajme ngjarjen ku ndër të tjera, pashë nga kamerat edhe makinën “Benz” që më kishin sjellë mua më parë për të vrarë Manecin dhe që ma mori Kevin pa më lajmëruar.
E kam telefonuar Kevin direkt por nuk ma ka hapur telefonin. Nga data 06.01.2022 më telefonon Kevin dhe më kërkon një test Covidi për të kaluar kufirin, ia bëj në Durrës tek një laborator që ndodhet në Kënetë në rrugën “Vllazërimi”.
Ia kam bërë dhe ka ardhur për ta marrë vetë dhe ka paguar lekë për testin dhe më la dhe mua 50 euro. Kevinin e nxora direkt tek “Ura e Dajlanit” në këmbë dhe gjatë kësaj kohe e pyeta për punën e “Don Boskos” dhe thashë që ç’a bëtë pse u gabua objektivi se është gjynah se u vra tjetër për tjetër. Më tha u gabua informata. Kur e pyeta se me kë kishte qenë, ai nuk më tregoi emër a person, por më tha që i kishte dhënë njërit një shumë prej 50 mijë eurosh.
Kevinin e mori nga “Ura e Dajlanit” një makinë tip “Porsche Cayenne”, tip i fundit se topat mbrapa i kishte me viza. Objektiv i atentatit në atë ngjarje ka qenë Geron Hasanbelli. Kevin është larguar drejt Kroacisë pastaj Gjermanisë dhe në dijeninë time është takuar dhe me Kasandrin, i cili i ka kërkuar llogari për ngjarjen tek Don Bosko. Ka komunikuar me mua dhe më ka thënë që të vrisja nipat e Geronit pasi kishin dalë në Astir.
