Marrëdhëniet midis Kosovës dhe Serbisë nën survejimin dhe direktivat e liderëve kryesore të BE, Emmanuel Macron dhe Olaf Scholz duket se po shkojnë drejt stabilitetit, teksa edhe vetë Aleksandër Vuçiç e pranoi që ka në tryezë një ofertë me “shpërblime” për të dy vendet.
Presidenti serb zbuloi pas samitit të Pragës se Brukseli i ka propozuar pranimin e anëtarësimit të Kosovës në OKB, në shkëmbim të një përparimi më të shpejtë të Beogradit drejt BE-së, ndërsa pranoi se Prishtina zyrtare nis në nëntor procedurat për anëtarësim në Këshillin e Europës.
Pas Vuçic, duket se edhe nga Kosova zërat janë se mund të ketë në të ardhmen e afërt një marrëveshje me Serbinë, pas deklaratës së bërë sot nga kryeministri Albin Kurti, i cili tha se ka një normalizim të raporteve.
Ndërkohë, Presidentja Vjosa Osmani në një intervistë për TRT World ka thënë se dialogu mes Kosovës dhe Serbisë është i ndërmjetësuar nga Bashkimi Evropian dhe që Serbia nuk po i respekton një mori marrëveshjes.
Por, ajo është bindur se vetëm një politikan mund të realizojë të paimagjinueshmen duke bërë që Serbia të njohë Kosovën si shtet të pavarur.
“Unë besoj që presidenti i Turqisë Rexhep Taip Erdogan ka rol të rëndësishëm te Vuçiç që rruga e vetme për stabilitet dhe paqe në Ballkanin Perëndimor është që ta pranojë pavarësinë e Kosovës”, ka deklaruar Osmani.
“Erdogan mund ta bindë që t’i mbajë premtimet”, shtoi më tej Osmani.
