Një grup shqiptar i krimit të organizuar i përfshirë në kalimin e emigrantëve në drejtim të Britanisë së Madhe nëpërmjet Spanjës është çmontuar nga bashkëpunimi i Agjencisë Kombëtare të Krimit “NCA” dhe Gardës Civile Spanjolle.
NCA ka publikuar një video në Twitter ku shihen agjentët që ndërhyjnë në një banesë në Spanjë, duke u vënë pranga 7 “boss-ave” shqiptarë që kontrollonin trafikun, duke u dislokuar në Spanjë nëpërmjet të drejtës së qëndrimit për 3 muaj në zonën Schengen.
Sipas britanikëve, rrjeti kriminal që u godit sot ka lehtësuar kalimet e shqiptarëve përmes qyteteve veriore të Bilbaos dhe Santander, duke përdorur tragetet dhe rrugët e transportit të mallrave për në Portsmouth, Southampton dhe Liverpool.
Emigrantët vinin me linja direkte nga Shqipëria në Spanjë për të vijuar më pas rrugën drejt Britanisë, ndërsa në shumicën e rasteve ata qëndronin në kampe me çadra përreth objekteve të porteve spanjolle.
The NCA has worked with @GuardiaCivil to dismantle an Albanian organised crime group involved in smuggling migrants to the UK via Spain. The network facilitated migrants through the northern cities of Bilbao and Santander into the UK using ferries and freight shipping https://t.co/zMS6aylEaM
— National Crime Agency (NCA) (@NCA_UK) October 8, 2022
Krerët e bandës së trafikut të qenieve njerëzore madje u siguronin emigrantëve strehim dhe ushqim derisa ata të nisnin udhëtimin e tyre për në Mbretërinë e Bashkuar.
Secili prej emigrantëve besohet se ka paguar shuma nga 3,000 deri në 15,000 euro për të ndjekur ëndrrën britanike dhe policia britanike ka arritur të identifikojë rreth 50 individë që kanë bërë kalimin duke u ndihmuar nga rrjeti i 7 kapove të arrestuar sot.
Oficerët e NCA me bazë si në Spanjë ashtu edhe në Londër punuan me Guardia Civil për më shumë se një vit për të identifikuar drejtuesit e organizatës. Midis 3 dhe 5 tetorit ata kanë kryer shtatë arrestime, dy në Madrid dhe pesë të tjera në rajonin bask.
Mes të arrestuarve janë dy burra që besohet se janë krerët e rrjetit kriminal, të cilët kryesisht jetonin në Shqipëri, por u gjet momenti i duhur për t’i vënë në pranga në momentin që fluturonin nga aeroporti i Barajas, në Madrid.
Gjatë bastisjeve, të cilat u mbështetën nga oficerët e NCA me bazë në Spanjë, hetuesit sekuestruan sende të shumta me interes, duke përfshirë telefona, kompjuterë, karta banke dhe fatura parash, si dhe disa dokumente identiteti dhe pasaporta të kombësive të ndryshme.
“Kontrabanduesit e njerëzve vënë në rrezik jetët, kjo është arsyeja pse ndërprerja dhe çmontimi i rrjeteve kriminale si ky është një prioritet për NCA-në dhe partnerët tanë. Në këtë rast ne u përballëm me një grup krimi që ishte përgatitur të kontrabandonte migrantë me kamionë mbi një nga kalimet më të gjata të trageteve dhe mallrave në Mbretërinë e Bashkuar. Rreziqet e kësaj janë të vetëkuptueshme”, tha menaxheri Rajonal i NCA Steve Reynolds.
Ndërkohë, mediat spanjolle kanë raportuar se mafia shqiptare me bazë në Biskaia ka bërë kalimin edhe të të miturve, teksa i fusnin si turistë në tragete nga Porti i Bilbaos dhe gjithashtu nga Santander.
