Fati i të shumëkërkuarit të drejtësisë Ervis Martinaj mbetet ende mister, me policinë e shtetit që ende nuk ka një përgjigje nëse “Mbreti i Kumarit” është ekzekutuar nga grupet rivale apo ka krijuar një skenar për t’u arratisur jashtë vendit.
Por gjatë gjithë kësaj kohe në media janë publikuar disa foto të Martinajt, ku ai shihet edhe midis eskortave në vendin e njohur si “Peshqirat” në Gjermani.
Mister mbetet edhe fakti se kush është dora që po i nxjerr këto imazhe në media. Për ish-drejtuesin e policisë, Shemsi Prençi ato mund të kenë dalë prej rivalëve të tij.
Prençi thotë se kjo mund të bëhet për të tërhequr vëmendjen e Policisë së Shtetit dhe për të mos i shkuar deri në fund së vërtetës.
“Unë besoj se këto investohen nga kundërshtarët, për të shmangur vëmendjen e Policisë së Shtetit, për të mos intensifikuar hetimet për të shkuar drejt së vërtetës. Sa më shumë të largohesh në kohë, aq më shumë venitet, bie interesimi i opinionit publik dhe mediave. Së shpejti do të futemi në një ingranim tjetër. Më pas, pritet kur të zihen njerëzit brenda grupit kriminal kundërshtar, të dalë e vërteta. Në mënyrë kategorike, nuk besoj se mund ta bëjë dikush tjetër”, tha ai në emisionin “Now”.
