Pavarësisht pushtimit dhe referendumit për t’i aneksuar, territoret e fituara në fillim të luftës nga Rusia në pjesët jugore dhe lindore të Ukrainës, janë duke u marrë në dorë nga ushtarët e Kievit një e nga një.
Në dy fronte, në jug dhe në lindje, kundërofensiva e Ukrainës për rimarrjen e territoreve të pushtuara nga Rusia pothuajse që nga fillimi i luftës po vazhdon me shpejtësi të madhe.
Ajo që i befason vëzhguesit perëndimorë është shpejtësia me të cilën rusët tërhiqen në gjendje të keqe, me viktima të rënda dhe material që ata lënë në duart e ukrainasve, shpesh të paprekur.
Shtabi i Përgjithshëm i Ukrainës nënvizoi në një deklaratë për shtyp se në jug “armiku po humbet moralin”.
“Ata po braktisin pozicionet e tyre dhe po tërhiqen në një distancë të sigurt, duke shkatërruar rezervat e tyre të municionit dhe duke u përpjekur të shkatërrojnë urat”, ka shkruar ai në Facebook.
Me rëndësi kyçe për Ukrainën është rimarrja e Khersonit dhe krahinave të saj në Ukrainën jugore.
Rajoni ka një rëndësi strategjike për të dy palët ndërluftuese për arsye të ndryshme. Nëse ajo kthehet nën administrimin e Ukrainës, Presidenca e Zelenskyt do të ketë nën kontrollin e saj një zonë pjellore pranë Detit të Zi.
Por gjithashtu do ta vendosë Krimenë – ku ka instalime kritike ushtarake ruse – edhe më tej në rrezen e artilerisë ukrainase, siç është HIMARS-i i dhënë nga SHBA.
Edhe zyrtarët rusë me bazë në Kherson konfirmojnë avancimin ukrainas, ndërsa theksojnë se forcat e Moskës janë në pozicion mbrojtje.
Në jug, Vladimir Saldo, kreu i distriktit të imponuar nga Rusia në Kherson, pranoi se forcat ukrainase kishin arritur pranë Dunchany , një qytet në lumin Dnieper, rreth 30 kilometra në jug të vijës së mëparshme të frontit.
Por përfaqësuesi i shtypit i Ministrisë ruse të Mbrojtjes, Igor Konasenkov, pranoi se “duke pasur forca të blinduara superiore, armiku arriti të depërtonte thellë, duke thyer vijën e mbrojtjes”, në bregun perëndimor të Dnieper.
Trupat ukrainase u zhvendosën gjithashtu drejt Luhanskut, në Ukrainën lindore, e cila kontrollohet nga Rusia. Ditët e fundit ata kanë çliruar pothuajse të gjithë provincën e Kharkiv-it, progres mbresëlënës duke qenë se brenda pak ditësh Rusia humbi të gjithë territorin që kishte fituar në javët e para të luftës.
Përparimi i Ukrainës me dy fronte po i krijon Rusisë më shumë dhimbje koke sesa mund të përballojë, tha një zyrtar perëndimor për Ëashington Post në mënyrë anonime. Ditët e fundit, forcat ruse janë tërhequr nga një zonë pas tjetrës në bregun perëndimor të Dnieper. Në disa raste rrezikojnë edhe të bllokohen.
Por ka edhe një lloj disfate psikologjike që po pësojnë rusët, përtej asaj në fushën e betejës. Tokat që po rimarrin ukrainasit janë ato që presidenti Vladimir Putin ia kishte aneksuar Rusisë vetëm pak ditë më parë . Me Rusinë që nuk tregon shenja të përgatitjes së një kundërsulmi në front, humbja është gjëja e fundit që Putini do të dëshironte.
Pranimi edhe nga Rusia
Shembja e frontit tregohet edhe nga harta ushtarake e shfaqur të martën nga Ministria ruse e Mbrojtjes gjatë konferencës ditore. Harta, krahasuar me atë të një dite më parë, tregon se forcat ruse kanë braktisur një numër të madh vendndodhjesh, përfshirë këtu Dunchani, ndërsa ushtria ukrainase po udhëheq një kundërofensivë në këtë rajon.
Përveç kësaj, ai tregon rajonin e Kharkiv, në Ukrainën verilindore, dhe gjithashtu tregon se rusët kanë hequr dorë pothuajse nga i gjithë bregu lindor i lumit Oskil, zona e fundit e rajonit që ata ende kontrollojnë. Forcat ushtarake ruse u mundën gjithashtu atje nga një kundërofensivë ukrainase që zgjati disa javë.
Megjithatë, ushtria ruse nuk ka njoftuar një tërheqje , as nuk e ka komentuar këtë tërheqje të dukshme ushtarake të treguar në harta.
Russian withdrawal acknowledged on the Russia MoD mapping pic.twitter.com/Zg42HpMEUe
— Defense Politics Asia (@DefensePolitics) October 4, 2022
Informacioni me pikatore
Në të njëjtën kohë, presidenti i Ukrainës Volodymyr Zelensky nënvizoi se “ka vendbanime të reja të çliruara në disa zona”. Gjatë fjalimit të tij të djeshëm, Presidenti Zelensky tha se “luftimet e ashpra vazhdojnë në shumë fusha”, por nuk dha detaje.
Informacioni mbi përparimin e kundërsulmeve të Ukrainës është i pakët dhe gazetarët janë mbajtur kryesisht larg vijave të frontit. Megjithatë, ne po mësojmë në mënyrë indirekte detaje nga rrjetet sociale (siç është Telegram) dhe çfarë raportojnë rusët – dhe këto nuk kanë qenë pozitive për Rusinë prej javësh.
