Policia e Durrësit ka sqaruar ngjarjen e rëndë të ndodhur në zonën e Mamurrasit, ku dy vëllezërit Indrit dhe Gentian Beqiraj teksa udhëtonin me motor u përplasën me një makinë, dhe më pas njëri prej tyre u morr peng dhe u dhunua.
Personi që u rrëmbye ka treguar në polici se ishte duke udhëtuar me vëllain me motor në momentin kur një mjet u preu rrugën dhe u përplasën.
Pas përplasjes, motori doli nga rruga dhe dy vëllezërit janë konfliktuar me personat që ndodheshin në automjetin që u preu rrugën. Gjatë momentit të sherrit fizik, personat që ishin në mjet morën me forcë njërin prej vëllezërve, Indrit Beqirajn, dhe lëvizën rreth 500 metra me makinë, por më pas e nxorën nga mjeti dhe më pas u larguan. Indrit Beqiraj rezulton me precedentë të mëparshëm penale në fushën e narkotikëve.
Ngjarja u denoncua në polici nga dy vëllezërit, ndërsa RTVOra duke ju referuar burimeve pretendon se patrulla i është vënë pas makinës së autorëve që rrëmbyen Indritin, pasi kanë parë skenën në vendngjarje.
Teksa rasti po hetohet si heqje e paligjshme e lirisë, Policia e Durrësit ka reaguar për herë të parë mbi ngjarjen duke sqaruar se ka pasur një konflikt fizik në momentin që ndodhi aksidenti mes motorit dhe makinës.
Pavarësisht se policia deklaron se është duke hetuar ngjarjen, është mësuar se për rastin në fjalë janë identifikuar dhe shoqëruar 4 persona.
Personat e përfshirë janë pjesë e rrethit të të njohurve të dy vëllezërve Beqiraj dhe dyshohet se pas sherrit realizuan pengmarrjen në autostradën Tiranë – Durrës për prishjen e pazareve të drogës dhe shitjen e armëve të zjarrit.
Njoftimi i policisë:
Në autostradën Durrës-Tiranë, në vendin e quajtur “Koxhas”, shtetasit G. B. dhe I. B. (vëllezër), duke udhëtuar me motor, dyshohet se janë përfshirë në një incident rrugor, pasi një automjet ka goditur motorin e tyre, i cili për pasojë ka dalë nga rruga. Për këtë shkak, dy vëllezërit janë konfliktuar fizikisht me personat që ishin në automjet.
Në konflikt e sipër, personat që ishin në automjet kanë marrë njërin prej vëllezërve, shtetasin I. B., të cilin e kanë lënë në rrugë, larg nga vendi i konfliktit, dhe më pas janë larguar.
Nga strukturat hetimore të Drejtorisë Vendore të Policisë Durrës, nën drejtimin e Prokurorisë, në bazë të kallëzimit të shtetasit I. B., është regjistruar procedimi penal dhe po punohet për sqarimin e motivit dhe të rrethanave të ngjarjes, si dhe për implikimin e këtyre personave, në ngjarje të tjera.
