Pas konfliktit mes tifozëve dhe policisë në Indonezi mbetën të vrarë 174 persona dhe ky numër nuk është përfundimit, teksa në rrjetet sociale janë shfaqur video që tregojnë gjithë brutalitetin e forcave të policisë.
Tifozët vdiqën në krahët e lojtarëve gjatë përplasjes në stadiumin “Kanjuruhan” të Indonezisë, tha trajneri i ekipit vendas, pasi numri i fëmijëve të vrarë në tragjedi u rrit në 32.
Javier Roca tha se përplasja në ndeshjen, në të cilën humbën jetën 174 persona, e la atë “të shpartalluar mendërisht”.
Rreth 18 oficerë po hetohen pasi policia hodhi gaz lotsjellës ndaj tifozëve që pushtuan fushën kur ndeshja përfundoi.
Një dëshmitar okular i tha BBC-së se policia kishte gjuajtur shumë gaz “vazhdimisht dhe shpejt” pasi situata me tifozët u bë “e tensionuar”. Mbështetësit e ekipit vendas Arema FC vrapuan në fushë kur ndeshja përfundoi me humbje 3-2 ndaj rivalëve të tyre Persebaya Surabaya.
Zëdhënësi i policisë Dedi Prasetyo u tha gazetarëve se oficerët nën hetim “ishin përgjegjës për mbajtjen” e armëve dhe tha se ata po “merreshin në pyetje” nga një ekip i punëve të brendshme.
Ai shtoi se disa oficerë të tjerë, duke përfshirë ekipin e sigurisë në terren, dhe disa zyrtarë nga liga e futbollit indonezian, ishin gjithashtu nën hetim.
Komisioni i të drejtave të njeriut i Indonezisë tha se do të kryejë hetimin e vet për katastrofën dhe presidenti Joko Widodo ka urdhëruar që të gjitha ndeshjet në ligën më të lartë të Indonezisë duhet të ndalen derisa të kryhet hetimi zyrtar.
Më shumë se 320 persona të tjerë u plagosën pasi mbështetësit u shkelën dhe u mbytën në përplasje ndërsa iknin nga gazi. Zëvendësministri i Indonezisë për çështjet e fëmijëve dhe grave tha se fëmijët ishin të moshës nga 3 deri në 17 vjeç.
