Hakerimi nga HomelandJustice i sistemit “MEMEX”, ku policia e shtetit ruan dosjet e të gjithë personave nën hetim apo të dyshuar në lidhje me ngjarje kriminale, ka çuar në zbulimin e të dhënave edhe për të shumëkërkuarin e drejtësisë Ervis Martinaj.
Mes 40 dosjeve me dokumente, ku listohen mijëra foto dhe emra shfaqet edhe mbreti i lojërave të fatit, me një foto në rininë e tij, e cila shoqërohet me të gjitha të dhënat e Martinaj, si datëlindja, vendi i lindjes, atësia dhe gjendja civile.
Fotoja tregon një imazh tepër të vjetër të Ervis Martinajt, ndoshta prej kohës kur ai është skeduar për herë të parë nga policia shqiptare, ku ai mund te ketë qenë rreth moshës 24-25 vjeç.
Fotoja me shumë gjasë është realizuar të paktën 15 viteve më parë, ndërsa i çuditshëm është fakti se Policia e Shtetit “ka harruar” të rinovojë detajet dhe imazhin me të cilat shoqëron dosjen e Martinaj.
Ndërkohë, vetë mbreti i Kumarit vijon të rezultojë i zhdukur me çështjen e tij që mbetet një ndër më të nxehtat në duart e policisë së shtetit, teksa herë flitet se është ekzekutuar nga grupet rivale pas mbrëmjes së 9 gushtit dhe herë dyshohet se e ka sajuar historinë për t’u arratisur diku larg Shqipërisë.
