Shkolla 9-vjeçare “Vëllezërit Haradinaj” në Rrashbull të Durrësit, ishte një ndër veprat e para, pjesë e projektit të Rindërtimit që kishte në dorë Tigri i Financave, Arban Ahmetaj, që u inaugurua nga kryeministri Rama.
Më 24 nëntor të vitit 2020, dyert e shkollës në fjalë u hapën duke pritur të parin kryeministrin Rama dhe besnikët e tij, të cilët thanë se “ka rilindur më e madhe, më e fortë dhe pakrahasimisht më e bukur për 530 nxënës dhe mësuesit e tyre”.
Ndërkohë, që vetë Ahmetaj e informoi Kryeministrin se në vetëm 4 muaj punë bashkia e Durrësit, nxënësit dhe mësuesit kishin në dorë një shkollë të re.
Më tej ministri shtonte se shkolla “Vëllezërit Haradinaj” ishte ndërtuar me të gjitha standardet bashkëkohore, përfshirë sistemin e ngrohjes, ashensorin, palestrën dhe sallën e aktiviteteve.
Por, duket se suksesi i punimeve të shpejta nuk e ka nxjerrë faqebardhë Ahmetajn, teksa shkollës që ai i dorëzoi dhe lavdëroi aq shumë kryeministrit në momentin e inaugurimit, i kanë “plasur ujërat” ditën e sotme.
Kështu, mësohet se në shkollën 9-vjeçare ‘Vëllezërit Haradinaj’ kanë shpërthyer depozitat e ujit, duke bërë që të pezullohet përkohësisht procesi mësimor.
Rreth 530 nxënësit e arsimit 9-vjeçar të shkollës janë njoftuar kur kanë mbërritur mëngjesin e sotëm në shkollë për defektin në sistemin e kaldajave, dëmtimi i të cilave ka shkarkuar ujë në pothuajse të gjitha katet e objektit.
