Detaje të reja u zbardhën pasditen e sotme për rrëmbimin e 30-vjeçarit Nertil Buzi nga Fieri në zonën lindore të Londrës, me gjashtë të arrestuarit që e torturuan për rreth dy javë, duke kërcënuar familjarët e tij se do t’i merrnin jetën nëqoftëse nuk u paguanin në kohë 400 mijë paund.
Të arrestuarit për ngjarjen nga Metropolitan Police janë shtetasit shqiptarë Nekid Arapi, Xhon Guveli, Fation Arapi, Emanuela Arapi, Eduart Cepele dhe Armando Brahashaj, të gjithë anëtarë të një grupi kriminal të përfshirë në kultivimin e kanabisit në “shtëpitë e barit” në Britaninë e Madhe.
Por, njëri prej tyre, pikërisht Nekid Arapi është një person me të shkuar kriminale edhe në Shqipëri.
Sipas arkivave ai rezulton të jetë arrestuar nga Policia e Vlorës më 6 qershor 2018 i akuzuar si bashkëpunëtor në vrasjen e biznesmenit të kafesë në qytetin bregdetar, Vasil Dervishaj.
Per Arapin u caktua masa “arrest shtëpie” me mbikëqyrje elektronike, pasi sipas hetimeve ai kishte shoqëruar autorët një pjesë rruge me makinën e tij, ndërsa nuk ka qenë në vendin e ngjarjes në momentin e vrasjes së 29-vjeçarit Dervishaj.
Vrasja e biznesmenit të kafesë ndodhi në 4 qershor të këtij tek ish-kombinati i peshkut në lagjen ”Pavarësia’, ku i riu u qëlluar disa herë me armë teksa po udhëtonte me mjetin e tij tip ‘Ford’ me targa italiane “OD 476 AF”.
Dervishaj ka tentuar të hapë derën e makinës për t’u larguar, por nuk ka mundur dot dhe ka ndërruar jetë jashtë mjetit të tij, ndërsa njihej si pronar i dy bizneseve në Vlorë, si dhe tregtar kafeje.
Dy nga pistat kryesore që policia hetoi asokohe ishin vrasja për shkak të konkurrencës, si dhe prisha e pazareve të drogës, pasi viktima 29 vjeç kishte qenë i dënuar herët për trafik droge.
Njoftimi i Policisë së Vlorës për ngjarjen ku ka marrë pjesë Nekido Arapi, asokohe vetëm 21 vjeç:
Strukturat e Policisë së Shtetit të Sektorit për Hetimin e Krimeve të Rënda në Drejtorinë Vendore Vlorë, në bashkëpunim të ngushtë me Prokurorinë e Rrethit Gjyqësor Vlorë, prej datës 4 Qershor 2018, ku në lagjen “Pavarësia”, pas një konflikti për motive të dobëta mbeti i vrarë me armë zjarri pistoletë shtetasi V.D., 29 vjeç, kanë zhvilluar hetime intensive me qëllim zbardhjen, dokumentimin e plotë të rrethanave të ngjarjes dhe kapjen e vënien para drejtësisë autorët e krimit.
Si rezultat i një punë të mire organizuar është bërë e mundur zbardhja në kohë rekord e ngjarjes, identifikimi i autorëve të cilët janë shpallur në kërkim si dhe kapja e arrestimi i shtetasve të cilët kanë përkrahur autorët e krimit pas ngjarjes.
Konkretisht, janë shpallur në kërkim dy autorët, të cilët dyshohen se kanë kryer vrasjen e 29-vjeçarit:
Ø E.A., 31 vjeç, lindur në Tepelenë dhe banues në Vlorë;
Ø A.C., 28 vjeç, lindur në Tepelenë dhe banues në Vlorë.
Në vijim të veprimeve hetimore është kryer arrestimin në flagrancë të shtetasve:
Ø Nekid Arapi, 21 vjeç, banues në Vlorë,
Ø Amarildo Grembi (Muka), 28 vjeç, banues në Vlorë, të cilët kanë përkrahur autorët e krimit pas ngjarjes.
Policia e Vlorës në bashkëpunim me Prokurorinë po vijojnë punën për kapjen dhe ndalimin e shtetasve të shpallur në kërkim dhe vënien e tyre para përgjegjësisë ligjore.
Në cilësinë e provës materiale janë sekustruar:
– një armë zjarri kallashnikov model 56, me një krëhër me fishekë.
– një gëzhojë armë zjarri, model 9 mm,
– një pjesë predhe armë zjarri e dëmtuar.
– si dhe një automjet tip “Audi”, me të cilin dyshohet se janë larguar autorët pasi kanë kryer krimin.
Materialet hetimore iu referuan Prokurorisë Pranë Gjykatës së Shkallës së Parë Vlorë, në ngarkim të:
– Shtetasve E.A., dhe A.C., për veprën penale “Vrasje me paramendim e kryer në bashkëpunim” dhe “Mbajtje pa leje të armëve dhe municioneve luftarake” parashikuar nga nenet 78, 25 dhe 278 të Kodit Penal.
– Shtetasit Nekid Arapi dhe Amarildo Grembi për veprën penale “Përkrahja e autorit të krimit” parashikuar nga neni 302 i Kodit Penal.
