Policia holandeze ka vënë në pranga 4 persona, të lidhur me mafien e trafikut të drogës në Evropën Veriore, të gjithë të dyshuar si autorë të tentativës për rrëmbimin e ministrit belg të Drejtësisë.
“Europa Today” raporton se plani i dështuar i rrëmbimit u pengua thuajse rastësisht nga policia holandeze, e cila të enjten e kaluar identifikoi një makinë me targa holandeze, të parkuar jashtë shtëpisë së ministrit belg. Brenda makinës u gjetën një pushkë dhe shirit ngjitës. Ndërsa në një makinë tjetër, po ashtu e regjistruar në Holandë, janë gjetur disa shishe me benzinë.
Ministri Vincent Van Quickenborne, në një video-mesazh të transmetuar nga radio-televizioni belg RTBF, komentoi ngjarjen duke folur për “mafien e drogës”.
“Ne do të vazhdojmë të luftojmë krimin e organizuar me më shumë njerëz dhe burime se më parë. Në shtetin tonë ligjor e demokratik, ne kurrë nuk do t’i përkulemi dhunës”, u shpreh ai.
