Bordi i ngritur me vendim qeverie për caktimin e çmimit të tregtimit të karburanteve, ka vendosur këtë të Enjte shtrenjtimin e naftës dhe benzinës.
Sipas vendimit, 1 litër naftë do të shitet në pompa me 229 lekë/litri, me një rritje me 10 Lekë krahasuar me çmimin aktual.
Benzina do të rritet me 8 Lekë, duke u tregtuar me 203 lekë/litri.
I pandryshuar mbetet çmimi i gazit – 48 lekë/litri.
Njoftohet se çmimet e caktuara do të hynë në fuqi sot datë 29 shtator ora 20:00 dhe do të jenë të vlefshme deri në mbledhjen e ardhshme.
Vendimin e rritjes së çmimeve, bordi e argumenton me lëvizjet e bursës Platts të Mesdheut: “Vendimet që merr bordi dhe ndryshimi i çmimeve të shitjes lidhet vetëm me ndryshimet në bursën Platts të Mesdheut për gazoilin dhe benzinës, pra jo të bursës së naftës bruto, si dhe në lëvizjen e kursit të dollarit”.
Nga ana tjetër, opozita dhe ekspertë të ekonomisë i cilësojnë vendimet e marra nga ky ent, një vjedhje të qytetarëve, duke iu referuar çmimeve të larta me të cilat tregtohen karburantet.
Raportet e fundit kanë treguar se konsumatorët në Shqipëria janë mes atyre që e paguajnë naftën më shtrenjtë në botë.
Në qendër të kritikave qeveria është vënë edhe për taksat që mban mbi naftën.
Së fundmi, ka pasur edhe propozime për uljen e tyre me qëllimin uljen e çmimit final te konsumatori, megjithatë kryeministri Edi Rama ka mohuar në mënyrë kategorike prekjen e taksave mbi karburantet.
