Shqipëria do të presë për herë të parë një turne Europian të Taekwondo. Në fund të këtij muaji në Tiranë do të garojnë sportistë të kategorisë deri 21 vjeç. Drejtori teknik i federatës shqiptare e shikon si një shpagim për të kaluarën e kësaj disipline organizimin e këtij aktiviteti.
“Mezi krijonim një mundësi të merrnim pjesë në një aktivitet Europain apo Botëror, ndërsa sot po presim të gjithë shtetet e Europës për një kampionat Under 21”, u shpreh Marsel Peti, drejtor teknik i Federatës Shqiptare të taekwondo.
Shqipëria merr pjesë me 8 sportistë mes tyre edhe vendi i pestë në botë për të rinjtë, Ernest Merdanaj.
“Ka shumë kundërshtarë të njëjtë, por kam qenë te të rinjtë dhe tani jam te 21-vjeçarët e bën pak më të vështirë, por kemi pretendime për medalje, shpresoj ta arrijmë”, u shpreh Ernest Merdanaj, anëtar i kombëtares së taekwondo.
“Pak a shumë konkurrentët e tjerë i njoh, pasi kam zhvilluar ndeshje jashtë vendit me ta. Them që pretendoj për medalje”, u shpreh Ardit Hakcani, anëtar i kombëtares se taekwondo.
Salla sportive “Feti Borova” do të presë Kampionatin Europian i nën 21-vjeçarëve nga 27 deri më 30 Shtator, ndërsa hyrja do të jetë falas.
