Teksa zgjedhjet lokale po afrojnë, Partia e Lirisë ka ‘ndezur motorët’ elektoralë në Kuçovë.
Ish-deputeti Lefter Maliqi ka njoftuar këtë të Hënë çeljen e punës në zyrën e re të Partisë së Lirisë në qytetin e naftëtarëve.
“Me këmben e mbarë, sot bashkë me shtabin drejtues, me të rinj e të reja në kuadër të vazhdimit të punës intensive të ri-organizimit, me synimin e shtimit të radhëve në bazë”, shkruan në një postin në rrjetet sociale Lefter Maliqi, cili shton më tej se synimi është rikthimi i pushtetit te qytetarët.
“Me besim dhe ftesë për çdo themelues e anëtarë, për një ri-bashkim si forcë politike për rezultat të shkëlqyer në Këshillat Bashkiakë dhe fitues si opozitë në sfidat lokale dhe ato parlamentare. Synimi ynë kthimi Pushtetit qytetarëve”, shton Maliqi, i cili është një njohës i mirë i problematikave dhe realitetit të qytetit për shkak edhe të detyrës që ka mbajtur si deputetet i Qarkut Berat, pjesë e së cilit është Bashkia Kuçova, si dhe angazhimeve të tij të mëparshme që e kanë lidhur me këtë qytet.
Në një postim disa ditë më parë, ish-deputeti njoftoi edhe mbledhjen e parë e grupit të punës.
Lefter Maliqi ka qenë një ndër të parët politikanë që kanë shprehur bindjen se Edi Rama dhe qeveria e tij do të rrëzohen përballë një bashkimi të opozitës Berisha-Meta.
Edhe në një emision televiziv disa ditë më parë, ai artikuloi se opozita do të triumfojë si në zgjedhjet e ardhshme lokale, ashtu dhe ato parlamentare.
Ish-deputeti tha se edhe në 2009-ën, PD nuk ka qenë më LSI-në dhe mori 71 mandate, ndërsa 4 LSI, me të njëjtin sistem zgjedhor si tani. “Në rastin konkret ata janë të dy bashkë dhe Rama e di shumë mirë që LSI ka vota të majta, bashkimi i të dyve këtyre, konsumimi politik, pakënaqësia në popull e çon automatikisht në fitore. Ne po themi rrezikohet bashkia e Tiranës, jo më bashkitë e tjera”, tha Maliqi.
