“City Football Group” kërkon që të jetë më shumë prezent në botën e sportit. Grupi ku bëjnë pjesë kampionët e Anglisë, Mançester Citi ka bërë një ofertë për të blerë një tjetër klub të rëndësishëm.
Bëhet fjalë për brazilianët e Bahia, në adresën e të cilës ka mbërritur një çek prej 192 milionë Euro. Një ofertë që do i siguronte grupimit 90% të aksioneve të klubit që militon në divizionin e dytë të futbollit vendas, duke qenë një prej skuadrave pretendente për t’u ngjitur në elitë.
Blerja e dy herë kampionëve të Brazilit do ta shndërronte grupimin në atë më vendimtar në Botën e futbollit. “City Football Group” do e dërgonte në 13 numrin e klubeve nën zotërim.
Që nga blerja e Manchester City në vitin 2008, grupi ka marrë skuadra në të gjithë kontinentet, si Nju Jork Siti, Melburn Siti, Montevideo, Girona, Sishuan Xhiuniu, Mumbai Siti, Lomel dhe Trojes. Lëvizja e tyre e fundit ishte blerja e 80% të aksioneve të klubit italian të Palermos, që militon në Seria B.
