Janë publikuar për herë të parë pamjet e fundit që tregojnë të gjallë të shumëkërkuarin Ervis Martinaj, i cili prej 9 gushtit është zhdukur pa gjurmë. Në videon e publikuar nga emisioni “Në Shënjestër”, Martinaj duket se është nën shoqërinë e fektivit të Operacionales Jeton Lami, i cili aktualisht është pas hekurave. Bashkë me ta është edhe një vajzë, mikeshë e Martianjt.
Veshur me një bluzë të thjeshtë me krahë të shkurtra e pantallona të shkurtra, Martinaj duket mjaft i qetë teksa futet në hotel me Lamin e vajzën që i shoqëron.
Ervis Martinaj ishte shpallur në kërkim, në kuadër të operacionit “Plumbi i Artë”, pasi i penduari i drejtësisë Nuredin Dumani, tha se i kishte ofruar një ‘çek të bardhë’ në këmbim të ‘kokës’ së Indrit Dokles. Por, në 9 gusht, ai u zhduk pa gjurmë. Alarmin e ngritën familjarët e Martinajt dhe tashmë prokuroria po heton për rrëmbim personi dhe inskenim. Lidhur me këtë çështje, ka pasur edhe reagime nga kryeministri Edi Rama. Ai paralajmëroi edhe zhvillime, duke u shprehur se Policia e ka një përgjigje, por shumë shpejt do dalë me prova.
