Policia e Kukësit ka shpallur në kërkim një 47-vjeçar për shkak se në stadiumin “Kukës Arena” ka goditur me send të fortë futbollistin Tedi Cara.
“Specialistët për Hetimin e Krimeve të Komisariatit të Policisë Kukës referuan materialet në Prokurori dhe shpallën në kërkim, për veprën penale “Goditja e sportistit, trajnerit, arbitrit dhe ndërmjetësit sportiv”, shtetasin A. E., 47 vjeç, banues në Kukës, pasi gjatë ndeshjes së futbollit “Kukësi-Partizani”, të zhvilluar më datë 19.09.2022, në stadiumin “Kukës Arena”, ka hedhur një send të fortë (shishe me ujë të ngrirë) në fushë që ka goditur njërin nga futbollistët, shtetasin T. C.”, njofton policia.
A.E e ka qëlluar me shishe e cila ishte me ujë të ngrirë. Policia bën me dije se po vazhdon puna për kapjen e tij.
Mjekët konstatuan të çara shqetësuese në pjesët rreth syrit duke i bërë 7 qepje ndërsa lojtari iu bashkua skuadrës dhe udhëtoi me të kuqtë pas ndeshjes.
Përsa i përket Kukësit, klubi e dënoi ngjarjen e shëmtuar në minutën e 14 por sipas të gjitha gjasave do të mbyllë dyert e stadiumit për të paktën 4 javë.
Vendimin do ta marrë pas pak ditësh Komisioni i Disiplinës në FSHF, ndërsa trajneri Dobi duhet të bëjë llogaritë ndryshe pasi nuk do të ketë mbështetjen e tifozëve në të paktën 3 ndeshje të Superiores.
