Eksperti i kriminologjisë Ervin Karamuço, ka folur për të dhënat e publikuara nga grupi “Homeland Justice” të cilat ishin marrë nga posta elektronike që kishte në përdorim ish-kreu i Policisë së Shtetit, Gledis Nano.
I ftuar këtë të Martë në “ABC e Mëngjesit”, Karamuço ka deklaruar se Nano duhet marrë në mbrojtje.
Ai ka theksuar se ish-kreu i Policisë ka qenë njeriu që i është vënë nga mbrapa të gjitha grupeve terroriste në Shqipëri.
“Ai është një target për shkak se ka qenë drejtor i anti-terrorit. Ka qenë njeriu që i është vënë nga mbrapa të gjitha grupeve terroriste në Shqipëri. Ka informacion për këta. Është ekspozuar për Sirinë, është ekspozuar për Iranin. Ka bërë operacione që shumica e tyre nuk do të dihen, disa kanë qenë shumë të suksesshme që ju kanë bërë shumë dëm atyre. Veçse kanë ndaluar, kanë arrestuar, kanë përndjekur shumë prej tyre me të drejtë nga ana e shtetit tonë me partnerë ndërkombëtarë. Edhe të nxjerrësh informacionet e tij, të dhënat personale të familjarëve të tij, të bankave, numrave dhe gjithçka, do të thotë ta bësh një shënjestër. Ai duhet marrë në mbrojtje”, tha ai.
