Policia spanjolle ka bërë arrestimin e 32 personave, të cilët dyshohet se janë pjesë e dy organizatave kriminale, njëra me origjinë italiane dhe tjetra shqiptare, të rëndësishme për trafikun e drogës në ishullin Ibiza, por dhe zona të tjera të Spanjës.
I koduar “Dragon Ball”, operacioni u krye në dy faza, më 13 dhe 17 shtator, ndërsa 400 agjentë të Gardës Civile morën pjesë në Ibiza, Malaga, Barcelona dhe Tenerife. Gjatë operacionit u sekuestruan sasi të konsiderueshme lënde narkotike, armë zjarri, shuma të mëdha parash dhe dokumente që mund të lidhen me pastrim parash nga aktiviteti kriminal.
Rezultati përfundimtar i operacionit konsistoi në çmontimin e dy prej organizatave kriminale më të rëndësishme të dedikuara për trafikun e drogës që vepronin në ishullin Ibiza dhe futjen në treg të 94500 dozave MDMA dhe kokainë, me vlerë 4.1 milionë euro. Gjithashtu janë sekuestruar pasuri të luajtshme dhe të paluajtshme në vlerë të përafërt 22 milionë euro.
Droga e sekuestruar arrin në 18 kilogramë metamfetaminë me të cilën mund të ishin prodhuar 870 mijë pilula ekstazi, 4,5 kilogramë kokainë, një plantacion kanabisi me 600 bimë marihuanë, sasi të konsiderueshme substancash të tjera, mjete peshimi dhe printimi. Gjithashtu janë konfiskuar dy armë zjarri, 330 mijë euro para të gatshme dhe 23 automjete.
Gjithashtu u bllokuan 116 llogari rrjedhëse dhe 15 prona të dyshuara për pastrim parash. Midis sendeve të sekuestruara ishin ora luksoze (të markës Bulgari, Rolex dhe Cartier), bizhuteri, dokumente në lidhje me llogaritë bankare jashtë shtetit, dokumente të rreme identiteti, bllokues, një sërë telefonash celularë, USB, tableta dhe pajisje të tjera elektronike.
Mes 32 të arrestuarve janë italianë, shqiptarë dhe hungarezë dhe janë kryer 42 kontrolle pronësie, 38 në Ibiza, 1 në Barcelonë, 2 në Malaga dhe 1 në Tenerife. Janë kontrolluar edhe bodrumet e fshehura në pyjet e ishullit Ibiza. Operacioni u krye nga Garda Civile, në bashkëpunim me Karabinierët dhe Guardia di Finanza dhe me mbështetjen e DIA-s dhe personelit të specializuar të projektit ISF4@ON për luftën kundër grupeve mafioze.
