Prokuroria e Posaçme Anti-Korrupsion (SPAK) ka marrë në pyetje drejtorin e Teatrit Kombëtar, Hervin Çulin në kuadër të hetimeve për shembjen e godinës së Teatrit Kombëtar.
Bëhet me dije se Çuli ka qëndruar rreth 3 orë në SPAK ku ka dhënë deklaratën e tij për hetimet që po kryhen. Hetimet për shembjen e teatrit nisën pas kallëzimit të Aleancës për Mbrojtjen e Teatrit Kombëtar.
Prokuroria e Posaçme kundër Korrupsionit dhe Krimit të Organizuar është duke kryer hetime për shpërdorim detyre gjatë procesit të miratimit të vendimit dhe ekzekutimit të tij duke e finalizuar me prishjen e godinës së Teatrit Kombëtar mëngjesin e 17 majit 2020.
Hetimi nisi pas kallëzimit të Aleancës për Mbrojtjen e Teatrit të bërë më 31 dhjetor 2019 dhe 23 janar 2020. Kallëzimi i bërë nga Partia Demokratike në lidhje me këtë çështje i është bashkuar këtij procedimi penal.
