Kreu i Partisë Demokratike, Sali Berisha ka kujtuar viktimat e sulmeve terroriste të “11 shtatorit” në New York ku 2977 persona humbën jetën nga përplasja e avionëve në dy qendrat tregtare, sulmi më i rëndë terrorist në tokën amerikane.
Gjatë një postimi në rrjetet sociale, Berisha ka postuar një foto me flamurin amerikan ka shprehur nderim dhe ngushëllim për familjet e viktimave të këtij sulmi terrorist që u mor përsipër nga Al-Kaeda.
“Sot, 21 vjetori i sulmit terrorist që tronditi SHBA-në dhe botën! Të dashur miq, më 11 shtator të vitit 2001, grupi terrorist i al-Qaeda, i drejtuar nga Osama bin Laden, ndërmorrën sulmin më të egër terrorist ndaj Shteteve të Bashkuar në territorin e tyre, në të cilin u vranë 2900 qytetarë Amerikanë të pafajshëm. Me sulmin e tyre barbar të 11 shtatorit 2001, Osama bin Laden dhe lejntnantet e tij menduan se mund të mposhtin SHBA-në si “Kështjellë e Lirisë” së botës. Por ata moren nga forca e këtij vendi ndëshkimin e merituar asgjësues. Duke shprehur nderimin dhe ngushëllimet për viktimat e 11 shtatorit, familjeve të tyre dhe autoriteteve të SHBA-ve uroj që mesazhi i tyre për fytyrën e vërtetë dhe rrezikun e terrorizmit ndërkombëtar për paqen të mbahet mend nga vendet e lira gjithmonë”, shkruan Sali Berisha.
