Jo vetëm Jeton Lami. Ka dyshime të forta se edhe një agjent tjetër i Forcave Operacionale të Policisë dyshohet se ka ndihmuar të shumëkërkuarin Ervis Martinaj. Gjithashtu ka dyshime se Ervis Martinaj është ndihmuar edhe nga punonjës të komisariatit të Fushë-Krujës.
Ndërkohë burimet nga grupi hetimor bëjnë me dije se agjenti i policisë i cili, u arrestua mbrëmjen e 23 gushtit 2022, që vepronte pranë forcave operacionale dyshohet se e ka transportuar Ervis Martinaj gjatë muajit qershorit në Lezhë e Kurbin e Shkodër.
Dyshohet po ashtu se veç ndihmës që i ka dhënë të lëvizë, të ketë dhënë dhe informata që kanë dekonspiruar operacioni policore.
“Nga hetimet e thelluara rezulton se 28-vjeçari, duke qenë punonjës policie, ka shpërdoruar detyrën duke përkrahur dhe transportuar një person shumë të kërkuar”, informoi sot policia.
Ndaj tij Gjykata e Shkallës së Parë Kurbin, me vendimin e datës 23 gusht 2022, ka caktuar ndaj tij masën e sigurimit personal “Arrest në burg”, për veprën penale “Shpërdorimi i detyrës”.
Policia njoftoi sot arrestimin e Jeton Lamit pas hetimeve të kryera në kuadër të procedimit penal për veprën penale të rrëmbimit të personit. Hetim që nisi pasi xhaxhai i Martinajt kallëzoi disa javë më parë se kishte humbur kontaktet me nipin.
