Përfaqësuesi i lartë i Bashkimit Evropian (BE) për Politikë të Jashtme, Josep Borrell, i ka shprehur ministrit të Punëve të Jashtme të Turqisë, Mevlut Çavuşoglu, shpresën e tij se Turqia mund të përdorë ndikimin e saj mbi Rusinë.
Borrell ka bërë një deklaratë nga media sociale lidhur me bisedën telefonike të kryer me ministrin turk Çavuşoglu.
Ai tha se ka vënë theksin mbi rolin e Turqisë në sigurimin e marrëveshjes së OKB-së për eksportin e drithit ukrainas dhe pakësimin e agresivitetit të Rusisë kundër Ukrainës. Borrell bëri të ditur se kanë diskutuar edhe ndikimin e sanksioneve të BE-së.
“Kam shprehur shpresën time se Turqia mund të përdorë ndikimin e saj mbi Rusinë për të ndalur luftën e pakuptimtë”, është shprehur Borrell.
