Gjykata e Tiranës ka dhënë një dënim të ri me burg për Arbër Çekaj, biznesmenin e dënuar me 14 vite burg nga Gjykata e Posaçme për trafikimin e 613 kg kokaine kolumbiane në Shqipëri. Çekaj është shpallur i fajshëm për tentativën e arratisjes nga burgu 313 në kryeqytet në gusht të vitit të kaluar.
Për shkak të gjykimit të shkurtuar, dënimi i tij është ulur në 1 vit. Në të njëjtën dosje, gjykata ka dënuar përfundimisht me 2 vjet burg Lulëzim Çepelen, po i burgosur në 313 kur ndodhi tentativa e arratisë. Ai u fajësua për “dhënie ndihme një të burgosuri për largim”. Sipas gjykatës, Çepele ditën e ngjarjes ka prerë damarët për të krijuar shpërqendrim tek punonjësit e sigurisë.
Çekaj tentoi të arratisej bashkë me Fatmir Pjetrin, i cili gjykohet i veçuar. Në 8 gusht 2021 ata dolën nga zgara e zonës së ajrimit e më pas duke përdorur një litar të prodhuar me çarçafë zbritën në hapësirën para portës së burgut, por nuk munden të dilnin nga rrethimi.
