Koncesioni i autostradës Milot – Fier do të zgjatë 35 vjet, ndërsa përgjatë gjithë gjatësisë kalimi i automjeteve do të jetë me pagesë. Të ardhurat e kompanive që do të ndërtojnë rrugën do të sigurohen nga këto pagesa, ndërkohë që ngjashëm me kontratën për segmentin Thumanë – Kashar, për 8 vite buxheti i shtetit do të rimbursojë kompanitë private, në rast të trafikut të munguar.
Referuar dokumenteve të 3 garave koncesionare që u hapën 1 ditë më parë, vlera e investimit për 86.1 km rrugë parashikohet të jetë rreth 837 mln euro, pa TVSH. Pjesa më e madhe e autostradës apo 59.5 km janë rrugë ekzistuese, ndërkohë që vetëm 26.6 km janë gjurmë e re.
Në total Ministria e Infrastrukturës dhe Energjisë hapi të martën 3 gara koncesionare, duke e ndarë rrugën në 3 segmente. Ndërkohë që edhe segmenti Thumanë – Kashar është pjesë e autostradës Milot – Fier, por tashmë për këtë lot është nënshkruar kontrata koncesionare, ndërsa vlera e investimit nuk është bërë publike dhe nuk është pjesë e kontratës të publikuar në Fletoren Zyrtare. Ndërkaq, referuar koncesioneve të rinj, që parashikohet të jepen, i pari përfshin segmentin Lekaj – Fier, që ka një gjatësi prej 46 km që është tërësisht ekzistues.
Sipas dokumenteve të tenderit, në këtë segment do të shtohet vetëm korsia e emergjencës dhe 5 kryqëzime të reja, ndërsa parashikohet edhe përmirësimi i kryeqëzimeve ekzistues. Vlera e investimit për këtë kontratë parashikohet të jetë rreth 317.6 mln euro, pa TVSH.
Segmenti i dytë është Kashar – Lekaj, me gjatësi 26.6 km që do të ndërtohet në një gjurmë të re, ndërkohë që në total do të ketë një gjatësi prej 33.6, pasi 7 km të këtij seksioni janë pjesë e bypassit të Tiranës dhe do të ndërtohen nga kompania që do të kryejë punimet për këtë të fundit e për pasojë nuk janë objekt i koncesionit.
Vlera e investimit për këtë segment parashikohet të jetë 475 mln euro. Ndërkaq, segmenti i tretë Milot – Thumanë, me gjatësi 13.5 km është gjithashtu rrugë ekzistuese. Seksioni ekzistues është një karrexhatë me dy korsi dhe me dy sense lëvizjeje 2×2 (A1), me një trafikndarëse dhe korsi emergjence, ndërkohë që koncesionari parashikohet të kryejë përmirësime për ta kthyer në një autostradë të Kategorisë A. Vlera Vlera e investimit për këtë segment parashikohet të jetë 44.6 mln euro. /SCAN
