Komisari i policisë, Arjan Tase, i cili aksidentoi për vdekje me një skaf, mesditën e së martës, një fëmijë 7 vjeç, që ndodhej në breg të detit në Potam të Himarës, raportohet se është marrë në pyetje nga oficerët e Agjencisë së Mbikëqyrjes Policore.
Nga raportimet mësohet se Tase ka deklaruar se në momentin kur ka goditur vajzën gomonia ka marrë gaz në mënyrë të menjëhershme dhe ka bërë një rrotullim në vend, duke goditur vajzën 7-vjeçare.
Në dëshminë e tij Tase ka deklaruar se në mëngjes kishte shkuar me makinë në Porto Palermo për të marre aty gomonen dhe se mjetin ia kishte marrë djalit të xhaxhait, por ka deklaruar se edhe vetë kishte leje drejtimi të mjeteve lundruese.
Tase kishte udhëtuar me gomone nga Porto Palermo në drejtim të Potamit ku do merrte gruan dhe fëmijët për t’i nxjerrë shëtitje në det me gomone.
