Deputeti demokrat Kreshnik Çollaku ka rrëfyer momentin tragjik që ndodhi në Potam të Himarës, kur një skaf i drejtuar nga komisari Arjan Tase, goditi për vdekje një vajzë 7 vjeçare.
I ndodhur 20 metra larg vendit të ngjarjes, Çollaku tha për Faxnews se fëmija ndodhej në breg dhe familjarët e tij ishin pranë, duke e quajtur të gjithën një çmenduri.
Ai bëri thirrje që të merren masa urgjente për pezullimin e lundrimit të skafeve pranë bregut për të parandaluar ngjarje të tilla.
“Fëmija ishte në breg të detit pranë cadrës. Dukej si cmenduri, si mund të lejohet? Familja ishte prezente, duhej vendim drastik para se të ndodhte. Një tmerr i vërtetë, isha 20 metra larg vendngjarjes.
Është jashtë çdo lloj llogjike, në pamje të parë ka një mirëqenie që një efektiv i thjeshtë s´mund ta ketë. Këta janë të papërgjegjshëm, duhet absolutisht marrja e masave për personazhe të tilla, tronditëse e gjitha.
I bëj thirrje në mënyrë urgjente, të pezullohet çdo skaf në afërsi të plazheve, këto tangërlliqet për performance, papërgjegjshmëria është e madhe”, tha ai.
