Bersant Celina, sulmuesi 25-vjeçar, do të jetë lojtari më i ri i Kasimpasas. Aty do t’i bashkohet bashkëkombësit të tij, Florent Hadërgjonajt.
Para disa ditësh do të duhej ta kompletonte transferimin te Kasimpasa, por për disa arsye një gjë e tillë u shty.
Gjatë gjithë kësaj periudhe kohore e ardhmja e sulmuesit prizrenas ishte në një amulli të plotë, ku nuk dihej se çfarë të ardhme do të kishte ai. Ishin shumë pista që diskutoheshin, nga Rangers, deri te skuadrat tjera si Stoke City, të cilat ishin të interesuara për shërbimet e tij.
Përfaqësuesit e lojtarit, së bashku me vetë atë, në fund arritën një gjuhë të përbashkët me klubin turk, Kasimpasa.
Pas disa viteve që kaloi në futbollin anglez, tashmë Turqia do të jetë destinacioni i tij i radhës, për ta provuar edhe një përvojë të re.
