Këngëtari kanadez i popit Shawn Mendes ka anuluar datat e mbetura të turneut të tij për t’u fokusuar në mirëqenien e tij.
Në një deklaratë të postuar në rrjetin e tij social, Mendes tha: “E nisa këtë turne i emocionuar që më në fund të kthehesha në koncerte live pas një pauze të gjatë për shkak të pandemisë, por realiteti është se nuk isha aspak gati për sa i vështirë do të ishte turneu.
Pasi fola me ekipin tim dhe punova me një grup të jashtëzakonshëm profesionistësh shëndetësorë, është bërë më e qartë se më duhet të marr kohën që nuk e kam marrë kurrë personalisht, për të vendosur veten dhe për t’u kthyer më i fortë.
Më thyhet zemra t’ju them këtë, por ju premtoj se do të kthehem sa më shpejt që të gjej kohën e duhur për t’u shëruar.”
Ai shtoi se shpresonte të riorganizonte shfaqjet në të ardhmen dhe falënderoi fansat për mbështetjen e tyre, duke u thënë atyre se anulimi i shfaqjeve nuk do të thotë se ai do të ndalonte së bëri muzikë.
Mendes deri më tani kishte realizuar vetëm 7 nga 87 koncertet që kishte planifikuar në SHBA dhe Evropë.
Njoftimi vjen pasi këngëtari lajmëroi në fillim të këtij muaji se po anulonte disa data të turneut për të “shëruar dhe kujdesur për veten dhe shëndetin tim mendor”.
