Remal Rada, ish-pjesëtar i repartit special RENEA u arrestua në kuadrin e operacionit të koduar “Double Strike”. Rada ishte pjesë e RENEA deri para 6 muajsh, kohë kur ishte larguar me dëshirën e tij nga ky repart.
Ai kishte vetëm 4 ditë që ishte kthyer nga Anglia në Shqipëri, ku në Tiranë lëvizte me një automjet luksoz me targa angleze.
Sipas raportimeve, mbrëmjen e djeshme, policia kriminale, ka vënë re në parkingun e një lokali tek rruga e Elbasanit veprime jo normale të ish-efektivit të RENEA-s.
Ai ishte bashkë me Elton Hithin, 28-vjeçari nga Laknasi, i dënuar më parë nga gjykata e Tiranës për “vjedhje me dhunë”.
Një person i tretë i ka dhënë një çantë, dhe ish efektivi Remal Rada së bashku me Elton Hithin e kanë futur brenda në makinë.
Ata janë larguar më pas në drejtim të rrugës së Elbasanit, ku janë ndaluar nga një postobllok i policisë “Shqiponja”, operacionalja dhe oficerë të komisariatit Nr.1.
Brenda në çantë policia gjeti një snajper modern, dhe municionin përkatës. Remal Rada, fillimisht ka pretenduar para ish-kolegëve të tij se e dinte që i kishin dhënë rroba, por më pas ka preferuar të mos flasë në procesverbal.
Të njëjtin qëndrim ka mbajtur dhe Elton Hithi, i cili ka qenë në serdiljen e parë të pasagjerit, kur ka ndërhyrë policia.
Elton Hithi, ka rrëfyer para policisë se kishte marrë çantën nga një person, pa i treguar emri, i cili i ka thënë se janë rroba sportive.
Por në çantën e kuqe, u gjetën sende të paligjshme si snajper dhe municione të kalibrave të ndryshme. Tashmë policia po kryen hetime për të zbuluar personin e tretë që ka dorëzuar çantën me armatim, tek dy personat e tjerë të cilët kanë preferuar të mos u tregojnë emrin.
Njëherësh policia, ka ushtruar kontroll në shtëpinë e ish-efektivit të RENEA-s, ku rezultoi se edhe në banesë ai mbante armë.
Në shtëpi policia sekuestroi një pistoletë pa lejë municioneve të ndryshme, dylbi, targa automjetesh, simbole të policisë së Shtetit. Ky nuk është rasti i parë, që efektivë të RENEA dhe njësive të tjera speciale në repartet e policisë, të arrestuar nga kolegët e tyre sit ë implikuar në veprimtari kriminale.
