Kontenieri me banane i kompanisë “Bana King”, nga i cili mungojnë 49 arka me banane, dhe për të cilën janë ngritur dyshime nga autoritetet policore se mund të kishte lëndë narkotike, ndodhej në një zonë në Portin e Durrësit, e cila nuk monitorohej nga kamerat e sigurisë.
Sipas raportimeve, nga 200 orë filmime të kamerave të sigurisë në Portin e Durrësit nuk zbuluan dot se si dhe kush e hapi kontenierin me banane.
Referuar burimeve nga grupi hetimor, raportohet se kontenieri para se të kalonte në skaner ishte vendosur në një zonë, që kamerat e sigurisë nuk kanë fushëpamje.
Në dosjen e prokurorisë bëhet e ditur se kontenieri me banane ka mbërritur në Durrës në datën 8 korrik.
Në 16 kur do të zhdoganohej, ai u gjet i paplumbosur. Më pas task-forca kontrolloi dokumentacionin e kompanisë porositëse ZICO sh.p.k dhe rezultoi se duhet të ishin 1200 kuti.
Ku hynë në brendësi të kontenierit zbuluan se aty ndodheshin 1.151 kuti me banane. 49 mungonin, ndaj lindën dyshime të arsyeshme se kontenieri është hapur dhe në ato kuti mund të ketë pasur lëndë narkotike kokainë.
Policia e Durrësit arrestoi 20 persona, 16 prej të cilëve ishin punonjës të sigurisë së Portit të Durrësit, por pjesa më e madhe e të arrestuarve, me vendim gjykate morën masat e sigurisë arrest shtëpie ose detyrim paraqitjeje, dhe vetëm për 8 prej tyre u vendos masa e sigurisë “arrest me burg”.
