Një ngjarje e rëndë ndodhi mesditën e sotme në Durrës, ku një 18-vjeçar u mbyt në det, pasi u fut për të shpëtuar dy të mitur, njëri prej të cilëve ishte vëllai i tij.
Anri Kashiku ishte futur në det që të shpëtojë vëllanë e tij Ersian Kashiku dhe shokun e tij 15 vjeç.
Dy të miturit rrezikonin që të mbyteshin. Të gjithë kanë shkuar në det që paradite.
Deti kishte nisur që të trazohej në mesditë dhe dy të miturit kanë hasur vështirësi në ujë.
18-vjeçari hero ia doli të shpëtonte dy të miturit që tashmë janë jashtë rrezikut për jetën.
Shpresat për ta gjetur të gjallë Kashikun u shuan pasi kaloi kohë dhe nga i riu nuk dukej asnjë shenjë. Policia njoftoi më vonë se kishte gjetur trupin e pajetë të 18-vjeçarit.
“Në vijim të informacionit paraprak për shtetasin A. K., rreth 18 vjeç, që dyshohet se u fut në det, për të shpëtuar dy fëmijë të mitur, ju bëjmë me dije se: Shërbimet e Policisë Kufitare kanë gjetur dhe kanë nxjerrë nga uji, trupin e pajetë të shtetasit A. K.”, njoftoi policia për ngjarjen.
Këtë sezon turistik kanë qenë të shumta rastet që kanë përfunduar në tragjedi.
Disa javë më parë një 53-vjeçar u mbyt në Palasë të Himarës, pasi dyshohet se i ra infarkt. Më herët një 15-vjeçar ishte mbytur në lumin Drini i Zi në Dibër, ndërsa lahej.
