Kolonia e karkalecave ka pushtuar arat e mbjella dhe ato djerrë edhe në zonën e Dumresë në Belsh. Dhjetëra hektarë kryesisht me jonxhë, misër dhe vreshtari janë infektuar nga ky dëmtues. Agronomi Mehdi Shehu pranon ekzistencën e vatrave të infektuara në Dumre dhe thotë se e vetmja zgjidhje është dezifektimi i të gjitha sipërfaqeve të mbjella, pasi fermrët thotë ai pyesin dhe pak medikamente blejnë.
Të shqetësuar fermerët thonë se po mbledhin sa të mundin nga kulturat bujqësore. Ata kërkojnë ndihmën e ministrisë së bujqësisë dhe pushtetit lokal.
“Tani që është periudhë që gjelbërimi është në masë, tani po futet edhe te pemët. Është një shqetësim shumë i madh për fermerët, na kontaktojnë dhe ne japim rekomandimet. Duhet një luftë masive për karkalecin. Ndryshe rishfaqet prap. Është shtuar në mënyrë masive”-u shpreh agronomi.
Ne fshatin Dëshiran demet nga karkaleci jane edhe më te mëdha. Kryeplaku Ferdi Mjeshtri thote se në emer të fermerëve i ka kërkuar ndihmë bashkise të kryejë dezifektimin, por mbeten në pritje.
Burime nga zyra rajonale e bujqësisë dhe mbrojtjes së bimëve në Elbasan bëjnë me dije se dëme nga karkaleci ka dhe ne fshatrat e bashkive Elbasan dhe Cërrik, por Dumreja mbetet më problematike. /Faxweb/
