Aktori amerikan, Tony Sirico, i njohur sidomos për rolin e Paulie “Walnuts” Gualtieri në “The Sopranos”, vdiq në moshën 79-vjeçare, njoftoi familja dhe një ish-koleg i tij.
Sirico luajti role të vogla gangsterësh në televizion dhe film për dekada përpara se të merrej me rolin ekscentrik të Paulie duke u bërë një nga personazhet më të paharrueshëm të serialit.
”Me pikëllim të madh, por krenari të pabesueshme, dashuri dhe shumë kujtime të bukura familja e Gennaro Anthony ‘Tony’ Sirico dëshiron t’ju informojë për vdekjen e tij”, tha bashkëshortja.
Një tjetër yll i ”The Sopranos”, Michael Imperioli shtoi se “më dhemb të them se miku im i dashur, kolegu dhe partneri im në krim, i madhi Tony Sirico vdiq”.
“Toni ishte si askush tjetër. Ai ishte i ashpër, besnik dhe i madh. Unë jam zemërthyer sot”, shkroi Imperioli.
I lindur në Bruklin, Nju Jork në vitin 1942, Sirico u arrestua shpesh kur ishte i ri, por ai kapi instiktin e komedisë në burg pasi pa një trupë ish-të dënuarish duke performuar.
Ai luajti disa role të vogla si bandit duke filluar nga fundi i viteve 1970 duke u shfaqur në shfaqje si “Kojak” dhe “Miami Vice” dhe filma me tematikë mafioze, përfshirë “Goodfellas” dhe “Mickey Blue Eyes”.
Sirico ishte në të 50-at kur iu dha roli i tij më i njohur në ”The Sopranos”, seriali novator i HBO që eksploronte jetën private të një sindikate krimi në Nju Xhersi.
Personazhi i tij Paulie dha shumë nga linjat më të paharrueshme të serialit, duke shfaqur humor të këndshëm dhe besnikëri të egër ndaj shefit Tony Soprano.
