Në moshën 38 vjeç dhe pas 19 vitesh karrierë, sulmuesi brazilian Fred i ka dhënë lamtumirën futbollit si profesionist me një ndeshje para tifozëve të Fluminense-s të bashkuar në Maracana.
Mbrëmje me emocione të mëdha për të interesuarin direkt, por edhe për të gjithë të pranishmit. Futbollisti, i futur në fushë në minutën e 78-të të ndeshjes kundër Ceara-s, e vlefshme për javën e 16-të të kampionatit brazilian, e ka mbyllur karrierën me një fitore, 2-1 për “Flu”.
Një spektakël i vërtetë ai i jetuar në këto orë nga Fred, i cili ka përshëndetur 63.707 spektatorët që kanë qenë të pranishëm kryesisht për të.
Sipas Ansa-s, është bërë fjalë për pjesëmarrjen e dytë më të mirë në tempullin e futbollit brazilian nga ristrukturimi i tij në 2013-ën, për Kupën e Botës të 2014-ës.
Për t’i përshëndetur të gjithë, Fred, pas fërshëllimës së fundit, ka bërë xhiro në fushë me një biçikletë, të njëjtën me të cilën ka përshkuar 600 kilometrat që ndajnë Belo Horizonte nga Rio de Janeiro në qershorin e 2020-ës, kur lajmëroi kthimin e tij te Fluminense.
