Ndarja administrative e vitit 2014 edhe për përfaqësuesit e universiteteve në vend ka rritur kostot dhe numrin e të punësuarve.
Përpara komisionit të reformës territoriale, pedagogët ngritën shqetësimin e mungesës së përfaqësimit të komuniteteve në zonat rurale.
“Ka disa këshilla bashkiak që kanë anëtarë vetëm nga zonat urbane, duke injoruar përfaqësimin e zonave rurale e sidomos e zonave të thella. Kjo nuk është vetëm për Tiranën, sot ka fshatra dhe territore ku nuk shkel më asnjë këshill bashkiak”, tha Besnik Aliaj, pedagog.
Për ta roli i qarkut ka humbur, ndaj dhe duhet parë mundësia e ndarjes së vendit në rajone.
“Qarku është diskredituar politik për shkak të vendimmarrjes që është marrë nga partitë politike dhe tashmë nuk ka vend më për ekzistencën e tij por ka vend që funksionet e tij të mbeten në territor. Unë personalisht besoj se riorganizimi i vendit në 80 deri në 90 bashki, në një brand të ri 6 rajone do të ishte një formulë realiste në këtë fazë të zhvillimit të vendit që është specifike”, u shpreh Aliaj.
I vetmi që doli kundër kësaj ideje ishte pedagogu Ervis Iljazi.
“Nuk jam për emërtimin rajon, se rajonet kanë kompetenca legjislative në të gjitha vendet që ekzistojnë, dhe në Spanjë, edhe në Itali që janë shtete rajonale kanë kompetenca legjislative. Shqipëria, pushteti lokal ka vetëm kompetenca administrative”, theksoi Iljazi.
Në javët në vijim përpara komisionit do të dalin për të raportuar 7 kryetarë bashkish dhe disa institucione.
