Është shtyrë për në datën 18 korrik, seanca në Gjykatën e Apelit në Tiranë për dosjen “Geron Xhafaj”.
Deputeti Ervin Salianji u shpreh pas daljes nga gjykata se sot mungonte një nga gjyqtaret dhe avokati dhe kjo ishte arsyeja pse u shty seanca.
Ai tha se ka paraqitur prova për të provuar pafajësinë e tij.
“Isha i vetmi i paraqitur në sallë për të ndjekur çështjen, pas akuzës së bërë nga një person i dënuar për trafik droge. Për shkak të mungesës së një prej gjyqtareve dhe avokatëve, seanca u shty për në datën 18. Ankimi është i plotë, elementët janë bërë publike, nuk ka pasur një vepër penale. Unë kam paraqitur prova kryesisht për publikun për të provuar pafajësinë time”, tha Salianji për gazetarët.
Salianji theksoi se ditës pas denoncimit, të nesërmen i akuzuari -vëllai i ministrit të Brendshëm shkoi për të kryer dënimin në Itali, ndërsa prokuroria u mor me denoncuesit dhe gazetarin.
Deputeti u shpreh se çështja u manipulua nga një dëshmitar i rremë, duke iu referuar Fredi Alizotit.
Në sallën e gjyqit, ishin sot dhe dhjetë deputetë të Partisë Demokratike.
Më herët, ish-kryeministri Sali Berisha denoncoi se Edi Rama dhe Fatmir Xhafaj kërkojnë hakmarrje ndaj deputetit, i cili i dha zë skandalit të vëllait të ish-ministrit të Brendshëm.
