Kryetari i PDK-së, Memli Krasniqi, shprehet se lajmi për vdekjen e Vjosa Berishës, është shumë i rëndë dhe i dhimbshëm.
Përmes një postimi në rrjete sociale, Krasniqi tregoi se me regjisoren Berisha njihej për një kohë të gjatë, dhe thotë se ajo ishte profesioniste e rrallë, një menaxhere e pashoqe, një mike e sinqertë dhe, mbi të gjitha, një person i dashur, me shumë vullnet, ide dhe kreativitet.
Postimi i plotë:
“Sa i rëndë e i dhembshëm lajmi për vdekjen e hershme të mikes së madhe, regjisores së veçantë e aktivistes së parreshtur, Vjosa Berisha.
Kam pas fatin që me Vjosën të njihemi gjatë e të bashkëpunojmë në projekte të ndryshme. Ka qenë një profesioniste e rrallë, një menaxhere e pashoqe, një mike e sinqertë dhe, mbi të gjitha, një person i dashur, me shumë vullnet, ide dhe kreativitet.
Vdekja e Vjosës është humbje e madhe për skenën shqiptare të artit dhe kulturës.
Ngushëllimet më të sinqerta Fatosit, Lekës, familjes së gjërë dhe tërë komunitetit artistik.
Do të na mungosh shumë, shoqe e dashur!”
