Gjykata e Posaçme e Apelit kundër krimit të organizuar zgjati edhe me 3 muaj të tjerë masën e pezullimit nga detyra për mjekun Edvin Prifti.
Ky i fundit kishte kërkuar heqjen e masës së vendosur ndaj tij nga gjykata e shkallës së parë, por trupa gjykyese me kryesues gjyqtarin dhimitër lara ka vendosur rrëzimin e ankimit.
Në seancë ka qenë i pranishëm vetë mjeku kardiolog Edvin Prifti, i cili ka kundërshtuar kërkesën e prokurorisë.
Ai ka thënë se argumenti se masa vendoset për ti hequr të pandehurit mundësinë e dëmtimit të hetimeve nuk qëndron pasi ai nuk prish provat duke operuar qytetarët për problemet me zemrën.
Edvin Prifti, ish shef i kardiologjisë në QSUT, fillimisht u arrestua dhe më pas u hetua në gjendje të lirë me akuzën e korrupsionit ndërsa SPAK i sekuestroi sasi të konsiderueshme pasurish burimi i të cilave po hetohet. Vetë mjeku Edvin Prifti në një reagim pak ditë më parë e cilësoi hetimin ndaj tij tendencioz dhe akuzat të fabrikuara duke pretenduar se nuk ka shkelur ligjin.
