Mbrëmjen e së mërkurës, në kuadër të operacionit anti-drogë të koduar “Tranziti”, u sekuestruan 45.5 kg kokainë në një kontejner që vinte nga Brazili.
Në pranga për sasinë e kokainës të sekuestruar në portin e Durrësit mbrëmjen e së mërkurës janë vënë administratori i kompanisë Arben Ferizi si dhe një agjent doganor në Portin e Durrësit, Egert Vargu. ‘Apetit Group’ me qendër në Kosovë, është kompania e cila kishte porositur mishin e pulës.
Në deklaratën e dhënë në polici, të arrestuarit Ferizi dhe Vargu kanë mohuar që të kenë lidhje me lëndën narkotike të sekuestruar.
Sipas tyre, kompania me të cilën punojnë nuk ka pasur asnjë dijeni për lëndën narkotike. Agjenti doganor Egert Vargu ka deklaruar se nuk është punë e ti që të kontrollojë kontejnerë.
Dëshmia e administratorit Arben Ferizi: Nuk kemi lidhje me drogën. Kompania ka porositur mish pule dhe të gjitha veprimet neve i bëjmë online. Porosisim online dhe nuk kemi nga ta dimë se çfarë ka në konteiner. Kompania ka vite që merret me prodhimin e salçiçeve dhe është e suksesshme.
Nuk ka nevojë të implikohet në trafikimin e drogës. Ne si kompani nuk kemi asnjë lidhje, nuk kemi dijeni për praninë e lëndës narkotike në konteiner.
Egert Vargu, agjent doganor– S’kam asnjë lidhje me këtë punë. Puna ime është të bëj procedura zhdoganimi. Unë nuk kontrolloj konteinerë. Nuk është puna ime. Puna ime është të merrem me dokumentacionin.
