Një bankë u grabit në Koplik të Malësisë së Madhe rreth një muaj më parë.
Siç e shihni dhe në videon 2 minuta e 20 sekonda, tre të rinj dalin me shpejtësi nga automjeti i tyre tip “Golf” dhe me armë në duar kërcënojnë punonjësin e sigurisë.
Më pas ata kërcënojnë dhe klientët që ndodheshin brenda bashkë me punonjësit e tjerë, të cilët shtrihen në dysheme të frikësuar. Grabitësit arritën të merrnin 10 mijë euro, 1 mijë dollarë dhe 4 milionë lekë të vjetra.
Policia e Shkodrës arriti të arrestojë sot 3 autorët e dyshuar të kësaj ngjarjeje, pas 4 javësh hetim intensiv.
Sot polumbarët e RENEA-s gjetën dhe një nga armët e përdorura nga autorët për këtë grabitje nën ujë në vendin e quajtur “Syri i Sheganit”.
Kanë rënë në pranga shtetasit Bekim Gurraj, 22 vjeç, Armir Shabaj, 25 vjeç dhe Admir Shabaj, 19 vjeç, banues në Aliaj, Malësi e Madhe.
Ndalimi i këtyre shtetasve u bë sepse në datën 09.05.2022, rreth orës 14:10, këta shtetas, në bashkëpunim me njëri – tjetrin, nën kërcënimin e armëve të zjarrit, kanë hyrë në degën e bankës, në Koplik, Malësi e Madhe dhe kanë marrë vlera të konsiderueshme monetare.
